Justified = God's child; persisting sinner = of the devil—cannot both be true

XVIII. Praeterea quicunque jam justificatus est, hoc ipso Dei filius est, a Deo adoptatus, & haeres vitae aeternae constitutus: sed quicunque peccato indulget, nec ab eo per veram poenitentiam recessit, ille ex diabolo est. Nam, ut idem Joannes testatur, qui facit peccatum ex diabolo est. Et per hoc manifesti sunt filii Dei, & filii diaboli: Quisquis non dat operam justitiae non est ex Deo. 1 Joh. 3. 8. & 10. Igitur, vel necesse est neminem qui dat operam peccato, & ei mancipatus est, habendum esse pro justificato: vel admittendum, contra manifestam Apostolorum sententiam, aliquem peccatum facere, & justitiae operam non dare, & tamen illum non esse ex diabolo, sed ex Deo; aut, quod veritati non minus repugnat, illum actu simul esse filium Dei, & filium diaboli, vel saltem aliquem justificatum esse qui nondum tamen sit Dei filius.