Salvation includes liberation and image-renewal—yet not of works (Eph; 2 Tim; Tit)

XXXVIII. Praeterea salus illa qua per Christum salvari dicimur, Ephes. 2. 8. 2. Tim. 1. 9. Tit. 3. 4. non consistit in sola condonatione peccatorum nostrorum, sed etiam in liberatione a servitute vitiorum, & in nostri reformatione ad Dei imaginem, quae consistit in vera justitia & sanctitate, ac proinde nostra sanctificatio, in salute ista, & quidem praecipue, includitur & comprehenditur. Et tamen Apostolus omnibus istis locis, affirmat nos non esse salvatos ex operibus, & secundum opera. Sic enim ad Ephesios scribit; Gratia estis salvati per fidem; & hoc non ex vobis, Dei enim donum est: non ex operibus, ut ne quis glorietur. Et Timotheo commemorat, quod Deus nos liberavit, seu salvos fecit; & vocavit vocatione sancta, non secundum opera nostra, sed secundum propositum suum, & gratiam quae data est nobis in Christo Jesu ante tempora secularia. Quibus similia sunt de quibus monet Titum, Cum autem, inquit, benignitas, & erga homines amor apparuit Salvatoris nostri Dei, non ex operibus justitiae quae fecimus nos, sed secundum suam misericordiam, salvos nos fecit per lavacrum regenerationis, & renovationem Spiritus Sancti, quem effudit in nos abunde per Jesum Christum Salvatorem nostrum. Ac proinde quantumvis extendatur justificatio, & complecti censeatur utramque partem salutis illius, qua per Christum in hac vita fidelibus obtingit, remissionem, scilicet, peccatorum, & renovationem interioris hominis, non minus tamen vere dicimur justificati, per Christi gratiam, fide, non operibus, quam si strictius sumatur pro sola a peccati reatu absolutione.