Ames with the British: 'my sins are remitted' is a deduced conclusion, lesser certainty than principles

CXXXVI. Deinde cum Theologis illis Magnae Britanniae, idem hac in parte sentire Amesium, clare ostendunt ejus verba quae alicubi citat in rem suam vir doctus. Dixerat Bellarminus statum quaestionis de certitudine quam quis habere possit, vel debeat de sua justificatione, & remissione peccatorum suorum, si absque fallacia & ambiguitate constituatur, hunc esse: Utrum debeat, aut possit aliquis, sine speciali revelatione, certus esse certitudine fidei divinae, cui nullo modo potest subesse falsum, sibi esse remissa peccata. Respondet Amesius his verbis: Sine omni fallacia & ambiguitate, non ponitur in hoc statu certitudo fidei divinae; quia non distinguit Bellarminus inter gradus certitudinis hujus, respectu principiorum quae immediate revelantur, & conclusionum ex illis evidenter deductarum, & inter certitudinem fidei in sese & illam quae est ex fide vel in apprehensione, vel in spe. Sed istis ambiguitatibus, admittimus hunc statum quaestionis, & affirmativam partem tuebimur contra Pontificiorum negativam. Sensus Amesii satis manifestus est illis qui sunt in Amesii lectione & doctrina versati, nempe in omnibus, quae dicuntur fide divina credi, non esse parem certitudinis gradum: Nam fide divina creditur non tantum principia immediate revelata, sed etiam conclusiones, quae ex principiis illis evidenter deducuntur; fidem autem non pari cum certitudine versari circa conclusiones & circa principia. Proinde cum haec propositio, mihi sunt remissa peccata, non sit immediate a Deo revelata, sed solum conclusio ex principiis revelatis deducta, fidem minori cum certitudine illam amplecti, quam ipsa principia.