Eternal motion would require infinite human generations — impossible

XXIV. Praeterea si motus qui in mundo observantur ab aeterno fuerunt, nec ullum sui initium habent, necesse est ut hactenus fuerint infinitae generationes hominum & caeterorum animalium, usque in istis generationibus detur progressus in infinitum: sed hoc est impossibile. Nam si in hominum generationibus daretur progressus in infinitum, nullus daretur primus homo, unde reliqui progeniti essent; sed omnes omnino homines, nullo excepto, essent ab homine geniti. Atqui fieri non potest, ut omnes omnino homines nullo excepto, sint ab homine geniti. Nam sic tota & integra hominum multitudo ab homine genita esset, quod dici non potest absque contradictione. Etenim si tota hominum multitudo ab homine genita est, necesse est ut ille a quo genita dicitur, vel sit extra multitudinem, vel in multitudine illa contineatur. Prius dici non potest. Nam fieri nequit ut integra hominum multitudo, ne uno quidem excepto, genita sit ab aliquo homine, qui in illa non comprehendatur: quandoquidem extra universalem hominum multitudinem nullus homo reperitur. Nec etiam dici potest, totam multitudinem hominum genitam fuisse ab aliquo, qui sit pars illius multitudinis. Nam si ita esset, homo ille, qui caeteros genuisse diceretur, se ipsum quoque genuisset. Nam qui genuit universam hominum multitudinem, singulos quoque genuit, qui in illa continentur, quorum unus ille est. At nihil se ipsum gignit, nec est sui ipsius causa.