Retorsion: Rome's Scripture-plus-tradition rule fails the same self-witness test

XXX. Quod ut evidentius fiat, rogamus Pontificios, si Scriptura non sit integra & sufficiens fidei regula, dicant nobis quae tandem illa sit. Respondebunt regulam illam constare tam verbo scripto, quam non scripto, quod est in ore Ecclesiae Romanae: Et verbum illud tam scriptum, quam non scriptum esse sufficientem & totalem fidei regulam, extra quam non sit aliud Dei verbum, & ex qua sola peti possint ea quae sunt necessaria ad fidem & salutem. Sic vero jam proprium eorum argumentum in ipsos retorqueo. Verbum illud partim Scriptura sacra constans, partim sine scripto traditionibus quibus Ecclesia Romana testimonium perhibet, non est sufficiens fidei regula. Nec enim omnia quae sunt ad fidem necessaria ex eo probari possunt. Etenim omnium maxime necessarium est ut credamus esse aliquod verbum vere divinum, & verbum istud constare partim Scripturis quibusdam, partim non scriptis traditionibus, & divinas istas Scripturas atque traditiones esse illas ipsas quibus Ecclesia Romana testimonium perhibet; nosque posse ac debere testimonio ejus hac in parte credere, tanquam omnino certo atque infallibili. Sed istud dogma tam necessarium, & quod tanquam totius religionis fundamentum profertur, non potest sufficienter haberi ex verbo, seu scripto, seu non scripto, quod est in ore Ecclesiae Romanae. Nam quamvis Scriptura affirmet se divinitus inspiratam esse, & Ecclesia Romana glorietur traditiones suas esse divinas, & verbum Dei ab ipsa tanquam ab infallibili teste petendum esse, Nec Scripturae tamen, nec traditionibus, nec Ecclesiae Romanae certo credam, quin prius credam Deum per Romanam Ecclesiam loqui, & tam Scripturam quam traditiones a Deo suam ducere originem. Itaque necesse est, praeter Scripturam & traditiones, & ipsum Ecclesiae Romanae testimonium, esse quoddam Dei verbum unde discam ista omnia esse divina, & fidem meam obligare: alioqui fides mea de authoritate verbi tam scripti, quam non scripti quod in ore habet Ecclesia Romana, nullo nitetur Dei verbo, & sic non erit fides. Denique nulla fidei regula fingi potest contra quam aliquis non possit simili argumento uti.