Apostles too may have written pious letters beneath canonical authority — 1 Cor. 5

VIII. Similiter Apostoli nostri, praeter eas Epistolas, quae Canonicam authoritatem in Ecclesia habere meruerunt, multas alias potuerunt scribere, pias quidem & sanctas, attamen non ejusdem cum prioribus illis authoritatis, ut quae a Deo non fuerunt inspiratae, sicut illae, immediate, & extraordinarie. Talis potuit esse Epistola illa Pauli cujus mentio fieri videtur 1 Corinth. 5. ubi sic ait Apostolus, Scripsi vobis in epistola ne commisceamini cum scortatoribus. Ista enim videntur commode referri non posse nisi ad aliam quandam ad Corinthios epistolam, quae priorem illam praecesserit. Quanquam sunt multi viri docti, tam ex nostris, quam ex Pontificiis, qui nolunt ibi Paulum designare epistolam quandam quae fuerit ab illa ipsa quam tunc scribebat diversa. Sed verba ejus sic interpretantur, scripsi vobis in hac epistola: Ut Paulus non respiciat ad aliam quandam epistolam, sed ad illa ipsa quae superius scripserat, de repurgando fermento, & e medio ipsorum tollendo illo scortatore, qui uxorem patris habebat.