Even the earliest unwritten traditions were already uncertain and contested

XXXVII. Sed ut clarius appareat, quam fallaces sint traditiones, quae tanquam Apostolicae extra Scripturam proferuntur, hic valde considerandum est, quod, si unquam traditiones illae certitudinem aliquam habuerunt, id maxime locum habere debuit primis Ecclesiae Christianae temporibus, quum recens adhuc erat memoria Apostolorum. At jam primis post Christum saeculis traditiones non scriptae ita incertae & variae erant, ut Doctores Ecclesiae de iis inter se certarent, & multi viri alioqui boni traditionum nomine decepti sint, & multa vana atque falsa tanquam Apostolicas traditiones sint amplexi. Ita testatur Eusebius Historiae Ecclesiasticae lib. 3. cap. ult. Papiam illum Episcopum Hierapolitanum, qui proxime post Apostolos vixit, traditionibus multum tribuisse, & inter alia scripsisse quinque libros de sermonibus Domini ex traditione non scripta, sed illos fabulis refertos fuisse. Sic quoque quum aliquanto post de celebratione Paschatis magna contentione inter Ecclesias Orientis & Occidentis certaretur, An scilicet praecise decima quarta lunae, an vero die Dominica post decimam quartam celebrandum esset: Polycrates, & alii Asiae Episcopi, qui prius illud tuebantur, traditionem Joannis & Philippi obtendebant: Victor vero Romanus, & alii Occidentales asserebant se Petrum & Paulum sequi, ut videre est apud Eusebium hist. Eccles. lib. 5. cap. 23. & seqq. & apud Socratem lib. 5. cap. 22. Ita non pauci ex antiquis existimarunt Apostolos instituisse stata quaedam & certa jejunia, hi quidem uno, illi vero alio modo. Sed Augustinus epist. 86. ad Casulanum, & Socrates lib. 5. cap. 22. negant Apostolos quicquam de jejuniis determinasse; Sed Ecclesiis liberum reliquisse quando & quomodo jejunandum esset. Et quum Augustinus in ista epistola tractet quaestionem illam, An Sabbato jejunandum sit, quod faciebant Romani & pauci Occidentales, traditionem Petri Apostoli obtendentes, reliquae vero Ecclesiae omnes aut negligebant, aut etiam illicitum ducebant, caeterorum Apostolorum, a quibus Evangelii doctrinam acceperant, traditione nitentes, judicat interminabilem esse istam contentionem generantem lites, non finientem quaestiones, adeoque ex non scripta traditione nihil certi haberi posse super jejuniorum ratione & modo. Sic etiam Tertullianus libro de corona militis, & Basilius libro de Spiritu sancto, recensent varias traditiones quas Apostolicas esse volunt, ut ex. gr. nefas esse jejunare diebus Dominicis, & iisdem diebus oportere stantes precari, ut & diebus omnibus a Paschate ad Pentecosten, quod etiam sanxit Nicena Synodus. Et tamen ista posterioribus saeculis observata non fuerunt, & pro traditionibus Apostolicis habita.