Agreement that images are adored properly—but split on whether the image alone can be integral object

XLI. Sed quamvis recentiores in eo consentiant, imagines proprie & vere adorandas esse, nihilominus inter eos controvertitur quis sit illius adorationis modus atque ratio. Fatentur quidem illi omnes imagines non debere adorari propter se, sed tantum propter exemplar quod repraesentant, & cujus similitudinem gerunt. Sed quaestio est, An, licet imago propter exemplar adoretur, tamen per se, & in se possit esse integrum objectum adorationis, ita ut adoretur adoratione diversa ab ea qua ipsum exemplar adoratur, & quae sic terminetur in ipsam imaginem, ut ejus materia proxima & immediata sit imago sola, non autem exemplar. Quemadmodum Legatus Regis honoratur propter Regem cujus nomine Legationem obit, sed tamen potest & solet honorari, honore cujus ipse terminus proximus est, & quo Rex, directe saltem, non honoratur, ac proinde qui est diversus ab eo, & inferior eo quo Rex ipse honorandus est.