Davenant: inherent justice not formal cause of strict justification

XLIV. Quibus consona sunt quae docet Joannes Davenantius Sarisburiensis nuper in Anglia Episcopus, qui de justitia habituali & actuali tractatum edidit accuratissimum. Is enim disputatione de Justitia habituali, cap. 22. sic loquitur, Concedimus esse in omnibus justificatis justitiam quandam inhaerentem, quam si formalem causam statuamus justificationis (liceat enim vocabulum procedere) haud repugnabimus, sed praedictae ju-stificationis, quae respondet stricto examini caelestis judicis, nec formalis, nec meritoria causa ullo modo potest. Tertio vero capite; probat ab hac, infusa, sive inhaerente justitia, fideles, seu renatos omnes vocari & censeri justos; idque ab ipso Deo. Non quidem, quod haec sanctitas infusa, aut inhaerens justitia perfecta sit: sed quod vera, ac minime hypocritica, Deoque nota & grata, qui illam infudit mentibus renatorum. Quod autem saepe apud Reformatos occurrit, per justitiam inhaerentem neminem justum esse coram Deo, cap. 3. docet intelligendum, non quasi simpliciter & absolute dictum, sed comparate solum, & secundum quid. Nempe non aliud significari per hoc, quam nos justitiam nullam habere, qua niti possimus, si stricte discutiamur coram tribunali di-vino: vel nos justitiam non habere quam lex Dei exigit, ad maledicti vitationem, & vitae aeternae consecutionem.