Believer 'does not work' means lacks law's perfect obedience—not empties of pious acts

XXXVII. Proinde juxta Paulum, per legem, sive opera nemo justificatur, nisi qui nullius est transgressionis reus, quique plane isti clausulae satisfecit, Qui fecerit ea homo vivet in eis. Illi vero qui credit in eum qui justificat impium, Deus justitiam sine operibus imputat, quoniam Deus illum pro justo habet, etiamsi non sit defunctus operibus quae lex exigit ad justificationem. Et similiter, quum credentem & operantem opponit Apostolus, docetque Deum justificare non operantem, sed credentem, per operantem intelligit illum qui opera lege praescripta sic praestitit, ut gratia opus non habeat, sed debeatur illi ex justitia merces: sicuti videre est cap. 4. epist. ad Rom. Ei qui operatur, inquit, merces non imputatur ex gratia, sed ex debito. Ei vero qui non operatur, sed credit in eum qui justificat impium, imputatur fides sua ad justitiam. Ubi, quum dicit Apostolus non operari eum qui credit, manifestum est eum dicere nolle, quod qui credit sit bonis omnibus operibus vacuus. Nam in eo qui viva & salutari fide credit, necessario multa bona opera reperiuntur, qualia sunt, dolor de peccatis admissis, & anteactae vitae detestatio, votum & studium vitae melioris, veniae spes, & fiducia in Deum, denique & timor, & amor, & pia nominis ejus invocatio. Sed dicitur non operari qui credit, quoniam non praestat opera juxta legem ad vitam obtinendam necessaria. Ac quamvis fidem ejus multa pia & sancta opera comitentur, Deus tamen, ut loquitur Apostolus, justitiam illi imputat sine operibus, quoniam caret operibus legis; id est, perfecta illa & exacta obedientia, sine qua lex nullum justum pronunciat.